Yay aylarında sərinləmək üçün üstünlük verilən buzlu qəhvələr düzgün hazırlananda aşağı kalorili və antioksidantlarla zəngin içki ola bilər. Lakin tərkibində şərbət, qaymaq və əlavə şəkər olan hazır buzlu qəhvələrin istehlakında diqqətli olmaq lazımdır.
“Yeni Sabah” xəbər verir ki, türkiyəli dietoloq Edanur Usta xüsusilə qəhvə şəbəkələrində satılan aromalı buzlu qəhvələrin yüksək şəkər və kalori ehtiva edə biləcəyini bildirib.
Buzlu qəhvələr həmişə zərərsiz deyil Sezar pizza
Dietoloqun sözlərinə görə, sadə qəhvə, su və buzdan hazırlanan buzlu qəhvələr adətən aşağı kalorili olur. Lakin aromalı şərbətlər, karamel sousları və qaymaq içkinin kalori və şəkər miqdarını əhəmiyyətli dərəcədə artıra bilər. Xüsusilə içkilərin tərkibindəki “gizli şəkər” mənbələrinə diqqət etmək lazımdır.
Qəhvə suyu əvəz etmir
Kofeinin sidikqovucu təsir göstərə bildiyini qeyd edən Usta isti havalarda itirilən mayeni qəhvə ilə əvəz etməyin düzgün olmadığını bildirib.
Buzlu qəhvə sərinlik hissi versə də, gündəlik maye ehtiyacının əsas mənbəyi su olmalıdır. Əks halda susuzlaşma riski arta bilər.
Bir stəkan buzlu qəhvədə nə qədər şəkər var?
Hazır satılan qaymaqlı və aromalı buzlu qəhvənin bir stəkanında 300-500 kalori və 40-60 qram əlavə şəkər ola bilər.
Ümumdünya Səhiyyə Təşkilatı gündəlik əlavə şəkər qəbulunun təxminən 25 qramı keçməməsini tövsiyə edir. Bu isə o deməkdir ki, bir stəkan aromalı buzlu qəhvə ilə gündəlik tövsiyə olunan miqdarın təxminən iki qatını qəbul etmək mümkündür.
Yayda mikroblar riski də artır
Süd tərkibli buzlu qəhvələrdə gigiyena qaydalarına xüsusi diqqət yetirmək lazımdır.
Kifayət qədər soyudulmayan və ya uzun müddət otaq temperaturunda saxlanılan südlü qəhvələrdə qida zəhərlənməsinə səbəb ola bilən bakteriyalar sürətlə çoxala bilər.
Həmçinin mütəmadi təmizlənməyən buz aparatları da mikrobioloji çirklənmə riski yaradır. Açıqda qalmış və ya soyuq zənciri pozulmuş südlü içkilərdən uzaq durmaq tövsiyə olunur.
Aromalı qəhvə şirniyyata çevrilə bilər
Sadə espresso və ya “cold brew” əsaslı qəhvələr aşağı kalorili seçim hesab olunur.
Lakin şərbət, qaymaq və əlavə şəkərlə hazırlanan qəhvələr yüksək şəkər yükünə malik içkilərə çevrilə bilər. Bu da qan şəkərində kəskin dəyişikliklərə, iştahanın artmasına və uzun müddətdə metabolik problemlərin yaranma riskinin yüksəlməsinə səbəb ola bilər.
Kofein miqdarına da diqqət edin
Sağlam böyüklər üçün gündəlik təhlükəsiz kofein miqdarının təxminən 400 milliqram olduğu bildirilir.
Gün ərzində həm isti, həm də buzlu qəhvə içildikdə bu həddi fərqinə varmadan keçmək mümkündür. Həddindən artıq kofein qəbulu ürəkdöyünmə, qan təzyiqinin yüksəlməsi, narahatlıq, yuxusuzluq və mədə problemlərinə səbəb ola bilər.
Hamilə və süd verən qadınlara isə gündəlik kofein qəbulunu 200 milliqramla məhdudlaşdırmaq tövsiyə olunur.
Yüksək təzyiqi, ürək ritm pozuntusu, reflüks və ya qastrit problemi olan şəxslər də buzlu qəhvə qəbul edərkən daha diqqətli olmalıdırlar.
Acqarına buzlu qəhvə içməyin
Kofeinli içkilərin acqarına qəbul edilməsi mədə turşusunun ifrazını artıra bilər.
Xüsusilə reflüks, qastrit və ya xora problemi olan insanlarda mədə yanması və həzm sistemi ilə bağlı şikayətlər yarana bilər. Bu səbəbdən buzlu qəhvənin yüngül yeməkdən sonra içilməsi daha uyğun hesab olunur.
Evdə hazırlanan buzlu qəhvə daha yaxşı seçimdir
Dietoloq bildirir ki, çəkiyə nəzarət edən insanlar da düzgün hazırlanmış buzlu qəhvə içə bilərlər.
Sadə və ya südlü “cold brew” və espresso əsaslı qəhvələrə üstünlük vermək mümkündür. Aromalı şərbətlərin əvəzinə darçın və ya vanil ekstraktından istifadə etmək olar.
Evdə hazırlanan qəhvədə məhsulların tərkibinə tam nəzarət etmək mümkündür. Hazır məhsullar alınarkən isə etiketə baxmaq, qlükoza-fruktoza şərbəti, karamel sousu, qaymaq və əlavə şəkər olan məhsulları mümkün qədər məhdudlaşdırmaq tövsiyə edilir.
Sərinləmək üçün ilk seçiminiz su olsun
Mütəxəssis yay aylarında orqanizmin əsas ehtiyacının su balansını qorumaq olduğunu vurğulayıb. Buzlu qəhvə suyun əvəzi kimi deyil, düzgün tərkiblə hazırlandıqda zövq və ya ara yemək məqsədilə qəbul edilə bilər. Gündəlik maye ehtiyacının əsas mənbəyi isə hər zaman su olmalıdır.
Əsmətxanım Rzazadə
Telegram kanalımız
