2026-cı ilin yanvar-iyun aylarında Azərbaycan Türkiyə tranziti ilə Suriyaya 735,3 milyon kubmetr təbii qaz ötürüb.
“Yeni Sabah” Türkiyənin Enerji Bazarını Tənzimləmə Qurumunun (EPDK) hesabatına əsasən xəbər verir ki, bu göstərici Türkiyənin ilk 6 aydakı ümumi qaz ixracının 66,49%-ini təşkil edib. Ötən ilin müvafiq dövründə Suriyaya qaz nəqli baş tutmamışdı.
Cari ilin birinci yarısında Türkiyənin ümumi qaz ixracı 1 milyard 105,96 milyon kubmetr olub. Bu həcmin 735,3 milyon kubmetri (66,49%) Suriyaya, 369,97 milyon kubmetri (33,45%) Bolqarıstana, 0,69 milyon kubmetri (0,06%) isə Şimali Makedoniyaya yönəldilib. Təkcə iyun ayında Suriyaya 162 milyon kubmetr qaz göndərilib. pizza
Həmçinin yanvar-iyun aylarında Azərbaycan ümumilikdə 4,1 milyard dollar dəyərində 12,43 milyard kubmetr təbii qaz ixrac edib ki, bu da illik müqayisədə həcm baxımından 0,5% çoxdur. Qazın ölkənin ümumi ixracındakı payı 25,15% təşkil edib.
Xatırladaq ki, 2025-ci ilin iyulunda SOCAR ilə Suriya hökuməti arasında imzalanmış memorandum çərçivəsində avqustun 2-dən Azərbaycan qazının Türkiyə üzərindən Suriyaya tədarükünə başlanılıb. Birinci mərhələdə illik 1,2 milyard kubmetr qazın Kilis vasitəsilə Hələb və Homs elektrik stansiyalarına çatdırılması və 1 200–1 300 МВт gücündə elektrik enerjisi istehsalının təmin olunması nəzərdə tutulur.
Telegram kanalımız
