“Moskva yeni tarixi şəraitə uyğun münasibət qurur“ -  Partiya sədri
30 Okt 2020 12:11
564

“Moskva yeni tarixi şəraitə uyğun münasibət qurur“ - Partiya sədri

"Rusiya prezidenti Vladimir Putinin Dağlıq Qarabağla bağlı müsahibəsi onu göstərdi ki, məsələnin həllində Rusiya öz bitərəfliyini qoruyub saxlayır".

Yenisabah.az xəbər verir ki, bunu Vəhdət Partiyasının sədri, millət vəkili Tahir Kərimli deyib.

Onun sözlərinə görə, Putin əvvəl də bildirmişdi ki, Dağlıq Qarabağ Ermənistan ərazisi deyil və döyüşlər Azərbaycan torpaqlarında aparılır:

"Bu açıqlama ilə əslində ermənilər cavabını almışdı ki, məsələyə 3-cü tərəf kimi Kollektiv Təhlükəsizlik Müqaviləsi Təşkilatı qarışa bilməz. Buna baxmayaraq Ermənistan hər dəfə çoxsaylı xahişlər edirdi ki, Rusiya Ermənistan tərəfə kömək etsin. Amma Putin bu çıxışı ilə bu istəyi darmadağın etdi".

Millət vəkili bildirib ki, Rusiya həmçinin yeni şəraiti də nəzərə alıb: "Artıq Rusiya başa düşür ki, proses bir ay əvvəlki kimi deyil və Azərbaycan işğal altındakı torpaqlarının bir hissəsini azad edib, beynəlxalq qüvvələrin məsələyə münasibəti xeyli dəyişib, Türkiyə Azərbaycanı müdafiə edir. Məsələyə üçüncü tərəfin qarışması nəticəsində Türkiyə məsələyə sakit qalmayacaq. Putin həmçinin bildirib ki, Minsk Qrupunun üzvü kimi Türkiyə və Avropanın digər dövlətləri də Qarabağ münaqişəsinin tənzimlənməsində iştirak edə bilərlər. Hazırda Azərbaycan və Ermənistan xarici işlər nazirləri Cenevrədə bununla bağlı danışıqlar aparırlar. Amerika Birləşmiş Ştatları da xəbərdarlıq edib ki, kənar dövlətlər bu proseslərə müdaxilə etməsinlər. ABŞ bu məsələdə təkcə Türkiyəni deyil, Rusiya və digər ölkələri nəzərdə tutur. Putinmhəmçinin çıxışında bildirdi ki, məsələdə Azərbaycan və Ermənistanın maraqları uzlaşdırılmalıdır. O həmçinin maraqların uzlaşdırılması formasını da deyib. Bu o deməkdir ki, artıq status-kvo və təmas xətti mövcud deyil. Azərbaycan torpaqlarını öz gücünə azad edir, beynəlxalq təşkilatların bu məsələ ilə bağlı müvafiq qətnamələrini artıq Azərbaycan özü icra edir. Azərbaycan tərəfi hətta bəyan edib ki, erməni tərəf öz qoşunlarını işğal altındakı ərazilərdən çıxarması üçün qrafik desə, döyüşlər dayandırıla bilər. Belə bir vəziyyətdə Ermənistanın status-kvonu bərpa etməsi mümkün deyil. Bu, Ermənistanın xəyalıdır. Azərbaycan işğaldan azad etdiyi torpaqlarından çıxan və təmas xətti bərpa edən deyil".

T. Kərimli bildirib ki, Ermənistan artıq bu məsələ ilə bağlı Rusiyaya güvənsə də, Moskva yeni tarixi şəraitə uyğun münasibət qurur: "Cənab Prezident İlham Əliyev də bildirdi ki, Rusiya və Türkiyənin yaxınlaşması regionda mövqeyi stabilləşdirər və yeni bir vəziyyət yarada bilər". (Trend)

“Moskva yeni tarixi şəraitə uyğun münasibət qurur“ -  Partiya sədri
Bizi Telegram-da oxuyun. Azərbaycanın və dünyanın ən vacib xəbərləri Şahidi olduğunuz hadisələri çəkib bizə göndərin!

Oxşar xəbərlər