Elektrikli avtomobil bazarında rəqabət sürətlə artır. İndi isə "Volkswagen"in "Jetta" brendi münasib qiymətə təqdim ediləcək yeni elektrikli sedanı M6 ilə diqqət çəkməyə hazırlaşır.
"Yeni Sabah" xəbər verir ki, Çinin Sənaye və İnformasiya Texnologiyaları Nazirliyinin məlumat bazasında görünən "Jetta M6" modelinin 2026-cı ilin ikinci yarısında satışa çıxarılması planlaşdırılır.
Yeni model fastback kuzov dizaynına malikdir. Avtomobilin təkər bazası 2 820 mm təşkil edir ki, bu da salonda daha geniş məkan vəd edir. Marqarita pizza
"Jetta M6" tək elektrik mühərriki ilə təklif olunacaq. Alıcılar 113 kVt və ya 145 kVt gücündə iki fərqli versiya arasında seçim edə biləcəklər. Avtomobilin maksimal sürəti saatda 172 kilometr olacaq.
Modeldə istifadə ediləcək litium-ion batareyalar Çinin CALB şirkəti tərəfindən istehsal ediləcək, avtomobil isə FAW-Volkswagen zavodunda yığılacaq.
Avtomobilin çəkisi komplektasiyadan asılı olaraq 1 557-1 628 kiloqram arasında dəyişəcək. "Jetta M6" 17 və 18 düymlük disklərlə satışa çıxacaq.
Bundan əlavə, alıcılar panoram dam, "köpəkbalığı üzgəci" formalı antenna və yan kameralar kimi əlavə seçimlərdən də yararlana biləcəklər.
"Jetta M6"nın təxminən 15 min ABŞ dolları qiymət seqmentində bazara çıxacağı gözlənilir. Şirkət bu modellə Çin istehsalı olan büdcə elektrikli avtomobillərə rəqib olmağı hədəfləyir.
Əsmətxanım Rzazadə
Telegram kanalımız
