Futbol tarixi hər dörd ildən bir bəşəriyyəti eyni nöqtəyə toplamağı bacaran, milyardlarla insanı eyni emosiya dalğasına qərq edən unikal bir hadisədir. Bu böyük səhnənin mərkəzində isə şübhəsiz ki, yaşıl meydanları öz istedadları ilə işıqlandıran, adlarını tarix kitablarına qızıl hərflərlə yazdıran futbolçular dayanır. Dünya çempionatları sadəcə ən güclü komandanı müəyyən etmir, həm də futbolda yeni epoxaların əsasını qoyan, sıravi oyunçuları əfsanəyə, gənc istedadları isə qlobal ulduzlara çevirən bir platformadır. Bu turnirlərdə parlayan simalar idman xronikasını dəyişdirməklə yanaşı, həm də milyonlarla insanın yaddaşında silinməz izlər qoyurlar.
“Yeni Sabah”ın araşdırmasına görə, bu böyük tarixin ilk unudulmaz parlaması 1958-ci ildə İsveç meydanlarında baş verdi. Cəmi 17 yaşında olan braziliyalı bir gənc, dünya futbolunun simasını birdəfəlik dəyişəcəkdi. Pele, turnir boyu nümayiş etdirdiyi sehrli oyunu, estetik hərəkətləri və həlledici qolları ilə təkcə Braziliyaya ilk çempionluğunu qazandırmadı, həm də "Futbolun Kralı" statusuna gedən yolun təməlini qoydu. Onun bu çıxışı, bir dünya çempionatının fərdi istedadın zirvəsinə necə çevrilə biləcəyinin ilk mükəmməl nümunəsi idi. Çox keçmədi ki, futbol dünyası başqa bir dahi ilə tanış oldu. 1986-cı ildə Meksikada keçirilən çempionat demək olar ki, tək bir adamın – Dieqo Armando Maradonanın dühası altında keçdi. Onun İngiltərəyə vurduğu, futbol tarixinə "Əsrin qolu" kimi düşən o möhtəşəm reyd, dünya çempionatlarının fərdi performansı necə ölümsüzləşdirdiyinin ən bariz sübutudur. Maradona o turnirdə təkcə kuboku qazanmadı, həm də bir futbolçunun bütöv bir komandanı necə çiyinlərində daşıya biləcəyini göstərdi.
Zaman keçdikcə fərqli nəsillər fərqli qəhrəmanlar yetişdirdi. 1998 və 2002-ci illər dünya futboluna "Fenomen" Ronaldonun dramatik və möhtəşəm hekayəsini bəxş etdi. Ciddi zədələrdən sonra geri dönərək Braziliyanı zirvəyə daşıyan Ronaldo, turnirin ən unudulmaz hücumçularından birinə çevrildi. Eyni dövrdə fransalı Zinəddin Zidan orta sahədəki zərifliyi və böyük matçlardakı soyuqqanlılığı ilə Fransa futbolunu dünyaya diktə etdi. Digər tərəfdən, Miroslav Kloze kimi stabil və işgüzar hücumçular estetikadan daha çox səmərəliliyi ön plana çıxararaq dünya çempionatları tarixinin ən çox qol vuran oyunçusu ünvanını ələ keçirdi və adını əfsanələr sırasına yazdırdı. pizza mizza
Müasir dövrə gəldikdə isə fərdi rəqabətin və komanda uğurunun zirvəsi 2022-ci ildə Qətərdə yaşandı. Lionel Messi, karyerasının ən böyük və çatışmayan eksiyini tamamlamaq üçün çıxdığı o tarixi turnirdə bütöv bir xalqın arzusunu gerçəkləşdirdi. Hər matçda liderliyi ələ alan, həlledici anlarda səhnəyə çıxan Messi, dünya çempionatı kubokunu qaldıraraq əfsanəvi statusunu tam mənası ilə taclandırdı. Eyni turnirdə onun qarşısında dayanan Kilian Mbappe isə gənc yaşında göstərdiyi sürət, güc və finalda etdiyi het-triklə növbəti dövrün dünya çempionatlarına kimin möhür vuracağını bütün dünyaya elan etdi.
Nəticə etibarilə, Dünya Çempionatları sadəcə qazanılan finallar və qaldırılan kuboklardan ibarət deyil. Bu turnirlər, ulduzu parlayan, çətin anlarda məsuliyyəti öz üzərinə götürən və yaşıl meydanda sehr yaradan fərdlərin hekayəsidir. Hər çempionat özü ilə birlikdə yeni bir qəhrəman gətirir və bu qəhrəmanlar vurduqları qollar, etdikləri ötürmələr və nümayiş etdirdikləri xarakterlə futbolu sadəcə bir idman növü olmaqdan çıxarıb, yaşayan bir sənət əsərinə çevirirlər.
Nazim Hacıyev
Telegram kanalımız
