Dəmir yolu keçidində baş verən qəza ciddi fəsadlara səbəb olub. Sürücü son anda avtomobili tərk edərək xilas olsa da, həm nəqliyyat vasitəsinə, həm də dəmir yolu təsərrüfatına ciddi ziyan dəyib.
Bu barədə “Yeni Sabah”a Baş Dövlət Yol Polisi İdarəsindən (BDYPİ) məlumat verilib.
Bildirilib ki, hadisə dəmir yolunun Salyan-Salmanlı sahəsində yerləşən qorunmayan keçiddə baş verib. “Mercedes” markalı avtomobilin sürücüsü dəmir yolu xəttinin üzərində məcburi dayandığı üçün hərəkətdə olan qatarla toqquşub. Xoşbəxtlikdən, qəza xəsarətlə deyil, maddi zərərlə nəticələnib. pizza mizza
BDYPİ-nin təhlillərinə əsasən, bu cür qəzaların baş verməsində sürücü məsuliyyətsizliyi əsas amillərdən biridir. Yaxınlaşan qatarı görmələrinə baxmayaraq, bəzi sürücülərin yol nişanlarının, svetoforların və digər nizamlama vasitələrinin tələblərinə əməl etmədən dəmir yolu keçidinə daxil olması təhlükəli vəziyyət yaradır.
Baş Dövlət Yol Polisi İdarəsi sürücülərə bir daha xəbərdarlıq edib. Qeyd olunub ki, dəmir yolu keçidlərinə yaxınlaşarkən yol nişanlarının, svetoforların, nişanlama xətlərinin, şlaqbaumun vəziyyətinin və keçid növbətçisinin göstərişlərinin tələblərinə əməl edilməlidir.
Sürücülər yalnız yaxınlaşan qatarın, lokomotivin və ya drezinanın olmadığına əmin olduqdan sonra hərəkəti davam etdirməlidirlər.
Aytac Əliyeva
Telegram kanalımız
