Noyabrın 15-dən etibarən Azərbaycanda güclü külək gözlənilir.
“Yeni Sabah” xəbər verir ki, Milli Hidrometeorologiya Xidmətinin məlumatına əsasən, noyabrın 15-i gündüz saatlarından 16-sı axşamadək Bakı və Abşeron yarımadasında, eləcə də ölkənin bir sıra bölgələrində güclü külək əsəcək.
Bununla əlaqədar Baş Dövlət Yol Polisi İdarəsi sürücülərə müraciət edərək yollarda daha diqqətli olmağa çağırıb. Onlayn mağaza
Bildirilib ki, güclü külək avtomobillərin idarə edilməsini çətinləşdirə, görmə məsafəsini azalda, ağac budaqları və müxtəlif əşyaların yola düşməsinə səbəb ola bilər. Bu hallar yol-nəqliyyat hadisələrinin başvermə riskini artırır.
Sürücülərə sürət həddini hava şəraitinə uyğun seçmək, ara məsafəsini artırmaq, qəfil manevr və ötmələrdən çəkinmək tövsiyə olunub. Xüsusilə körpülərdə, estakadalarda və açıq ərazilərdən keçən yollarda ehtiyatlı olmaq, iri və ağırtonnajlı nəqliyyat vasitələrini idarə edən sürücülərin isə küləyin yaratdığı əlavə təhlükələri nəzərə alması vacibdir.
Baş Dövlət Yol Polisi İdarəsi bütün hərəkət iştirakçılarını yol hərəkəti qaydalarına ciddi əməl etməyə, özlərinin və digər insanların təhlükəsizliyini qorumağa çağırıb.
Telegram kanalımız
