Havaların soyuması ilə sürücülər avtomobillərinə qış təkərləri almağa başlayıb. Lakin təkərin yeni olması onun qarlı və buzlu yollarda təhlükəsiz hərəkəti təmin edəcəyi demək deyil. Təkərin üzərindəki xüsusi işarələr, protektorun dərinliyi və hava təzyiqi də yol təhlükəsizliyinə birbaşa təsir göstərir.
“Yeni Sabah” xəbər verir ki, avtomobil sahiblərinin qış təkəri seçərkən diqqət etməli olduqları bir sıra vacib məqamlar var. Qış təkərlərinin yan hissəsində yerləşən üç zirvəli dağ və qar dənəciyi işarəsi (3PMSF) həmin təkərin müəyyən qar şəraitində sınaqlardan keçdiyini göstərir. Yalnız M+S işarəsi olan təkərlərin isə eyni sınaq tələblərinə cavab verdiyinə zəmanət verilmir. Buna görə də təkər alarkən üzərindəki nişanların mənasını bilmək vacibdir.
Qış təkərlərinin səthindəki dərin kanallar qarın və suyun kənarlaşdırılmasına kömək edir. Təkər aşındıqca bu kanalların təsiri azalır və avtomobilin yolda hərəkəti çətinləşir. Mütəxəssislər qış şəraitində təkərlərin xüsusiyyətlərini qorumaq üçün protektorun dərinliyinin mütəmadi yoxlanılmasını tövsiyə edirlər. Nəzərə almaq lazımdır ki, qanunla müəyyən edilən ən aşağı protektor həddi təhlükəsiz qış sürüşü üçün tövsiyə olunan göstərici ilə eyni olmaya bilər. Pepperoni pizza
Soyuq havalarda təkərlərin hava təzyiqi azalır. Təzyiqin normadan aşağı və ya yuxarı olması avtomobilin yola yapışmasına, əyləcləmə qabiliyyətinə və təkərlərin aşınmasına mənfi təsir göstərir. Bu səbəbdən təkərlərin hava təzyiqi avtomobil hərəkətə başlamazdan əvvəl, yəni soyuq vəziyyətdə ölçülməli və istehsalçının tövsiyə etdiyi göstəriciyə uyğunlaşdırılmalıdır.
Qış təkərləri aşağı temperaturda elastikliyini qorumaq üçün xüsusi hazırlanır. Buna görə də qar yağmasa belə, soyuq və yaş yollarda uyğun qış təkərlərindən istifadə etmək sürücülər üçün daha təhlükəsiz seçim hesab olunur.
Əsmətxanım Rzazadə
Telegram kanalımız
