Dünyanın ən təhlükəli yosun növü hesab edilən mikroalqın ötən il Avstraliya sahillərində yüz minlərlə dəniz canlısının ölümünə səbəb olduğu məlum olub.
"Yeni Sabah" xəbər verir ki, alimlər Cənubi Avstraliya sahillərində baş vermiş ekoloji fəlakətin səbəblərini araşdırarkən "Karenia cristata" adlı mikroalq növünün indiyədək tədqiq olunan ən zəhərli yosun olduğunu müəyyən ediblər.
Hadisə ötən ilin mart ayında Waitpinga çimərliyi də daxil olmaqla bir sıra sahillərə naməlum köpüyün yayılması ilə başlayıb. Qısa müddət ərzində balıqlar, ahtapotlar, dənizatları, dəniz atları, quşlar və dəniz məməliləri sahilə ölü halda çıxıb. Ümumilikdə yüz minlərlə canlının məhv olduğu bildirilir. Dominos pizza
Zəhərli köpüklə təmasda olan sörfçülər və bölgə sakinlərində isə öskürək, boğaz ağrısı və bulanıq görmə kimi əlamətlər müşahidə edilib. Nəticədə bir sıra şəxslər tibbi yardıma müraciət etməli olub.
Aylarla davam edən yosun çoxalması bölgədə ciddi ekoloji, iqtisadi və ictimai sağlamlıq problemlərinə səbəb olub.
"Nature Ecology & Evolution" jurnalında dərc edilən araşdırmaya əsasən, "Karenia cristata" sinir sisteminə təsir göstərən brevetoksin adlı güclü zəhər ifraz edir. Sidney Texnologiya Universitetinin alimi Şona Mürreyin rəhbərlik etdiyi tədqiqat qrupu laboratoriya şəraitində yetişdirdiyi nümunələr üzərində apardığı araşdırma zamanı müəyyən edib ki, bu yosun hətta çox aşağı sıxlıqda belə son dərəcə yüksək toksiklik nümayiş etdirir.
Alimlərin sözlərinə görə, "Karenia cristata" indiyədək öyrənilmiş ikinci ən zəhərli mikroalq növündən təxminən 10 dəfə daha güclü zəhər ifraz edir. Tədqiqatın nəticələri 2025 və 2026-cı illərdə baş verən kütləvi dəniz canlıları ölümləri ilə üst-üstə düşür.
Mütəxəssislər bildirirlər ki, hadisədən təxminən 15 ay keçməsinə baxmayaraq, yosun çoxalması bölgədə hələ də tam dayanmayıb. Onların fikrincə, soyuq sularda yaşaya bilən bu mikroalq oxşar sahil şəraitinə malik digər ölkələr üçün də potensial təhlükə yarada bilər.
Hazırda alimlər bu ölümcül yosunun qəfil sürətlə yayılmasına səbəb olan ekoloji amilləri və zəhərlənmə mexanizmini daha ətraflı araşdırırlar.
Əsmətxanım Rzazadə
Telegram kanalımız
