Dünyanın tanınmış zərgərlik şirkətlərindən biri olan Danimarkanın Pandora şirkəti gümüşün qiymətindəki kəskin dəyişikliklərə baxmayaraq, məhsullarında istifadə etdiyi materialların çeşidini dəyişdirmək planından geri çəkilmir.
“Yeni Sabah” xarici mətbuata istinadən xəbər verir ki, şirkət gümüş əvəzinə platin örtüklü məhsulların istifadəsini artırmaqla xərclərinə daha yaxşı nəzarət etməyi və mənfəət marjasını qorumağı hədəfləyir.
Pandoranın baş icraçı direktoru Berta de Pablos-Barbier bildirib ki, gümüşün qiyməti unsiya üzrə 65 ABŞ dollarından aşağı düşsə də, şirkət material portfelinin şaxələndirilməsi siyasətini davam etdirəcək. Onun sözlərinə görə, əsas məqsəd şirkəti xammal qiymətlərindəki dəyişikliklərə qarşı daha çevik etmək və müştərilərə müxtəlif material seçimləri təqdim etməkdir. Marqarita pizza
Bu yanaşma şirkətin yalnız bir qiymətli metaldan asılılığını azaltmağa və bazardakı kəskin qiymət dəyişikliklərinin maliyyə nəticələrinə təsirini məhdudlaşdırmağa imkan verə bilər.
Pandoranın bu ilin 2-ci rübündə maliyyə göstəriciləri də müsbət olub. Şirkətin əməliyyat mənfəəti ABŞ-dan əldə edilən birdəfəlik gömrük rüsumu geri ödənişinin də təsiri ilə 1,46 milyard Danimarka kronuna, yəni təxminən 226 milyon ABŞ dollarına yüksəlib. Əməliyyat mənfəət marjası 20,3% təşkil edib.
Hesabat rübündə şirkətin üzvi artımı 3% olub. Yeni açılan və bağlanan mağazaların təsiri nəzərə alınmadan satışlardakı artım isə 1% səviyyəsində qalıb.
Pandora gələcəkdə gümüş qiymətlərinin yenidən yüksəlməsi riskinə qarşı da tədbir görüb. Şirkət 2027-ci il üçün tələb edəcəyi gümüşün 90-100%-ni unsiyası 65 dollar səviyyəsində əvvəlcədən hedcinq edib. Şirkət qiymət artımının gələcək xərclərə təsirini məhdudlaşdırmaq istəyir.
Pandoranın gümüş qiymətlərinin aşağı düşməsinə baxmayaraq platin örtüklü məhsullar strategiyasını davam etdirməsi şirkətin yalnız cari qiymətlərə deyil, uzunmüddətli xammal və təchizat risklərinə də diqqət yetirdiyini göstərir.
Şirkət II rübün nəticələrindən sonra 2026-cı il üzrə proqnozlarını da yaxşılaşdırıb. Əvvəlcə 1% azalma ilə 2% artım arasında müəyyən edilən üzvi artım gözləntisi 0-3% aralığına yüksəldilib. İlin sonuna əməliyyat mənfəət marjası üzrə hədəf isə 22-23% səviyyəsində müəyyənləşdirilib.
Pandora səhmləri son üç ayda təxminən 55% bahalaşıb. Şirkətin maliyyə nəticələri açıqlanandan sonra Kopenhagen birjasında səhmlərin qiyməti səhər ticarətində təxminən 4% artıb. Analitiklər şirkətin nəticələrini və yenilənmiş proqnozlarını əsasən bazar gözləntilərinə uyğun qiymətləndiriblər.
Telegram kanalımız
