Kəlağayı artıq təkcə ənənəvi baş örtüyü deyil. Milli naxışlarımızı müasir geyimlərlə birləşdirən qadınlar bu ipək örtüyə yeni görünüş qazandırırlar.
Bəs əsrlərdir qorunan milli dəyərimiz müasir dövrdə necə yaşadılır?
Modelyer-dizayner Şəlalə Maqsudova bu barədə “Yeni Sabah”a danışıb. O bildirib ki, kəlağayı əsrlər boyu Azərbaycan qadınının zəriflik, həya və gözəllik rəmzi olub. Bu milli dəyərə verilən qiymət unudulmayıb, əksinə, müasir dövrdə yeni nəfəs qazanıb: Marqarita pizza
“Bəli, kəlağayı bu gün də yaşayır və hətta gənc nəslin ən sevimli dəb aksesuarlarından birinə çevrilib. Bu milli dəyərimizin bu gün necə yaşadıldığını müasir geyimlərdə istifadəsində görə bilərik.
Müasir yerli dizaynerlər kəlağayı motivlərindən (xüsusən də buta naxışından) yalnız ipək örtüklərdə deyil, müasir geyimlərin, çantaların və bəzək əşyalarının üzərində də istifadə edirlər.
Xüsusi günlər və hədiyyələr: Nişan, toy kimi xüsusi mərasimlərdə gəlinlərin başına kəlağayı örtülməsi ənənəsi davam edir. Eyni zamanda, xarici qonaqlara və ya sevdiklərimizə verilən ən dəyərli və zərif hədiyyələrdən biridir”.
Modelyerin sözlərinə görə, kəlağayı indi təkcə baş örtüyü deyil. Qadınlar onu boyunlarına bağlayır, çiyinlərinə salır, gündəlik geyimləri ilə də uyğunlaşdırırlar:
“Keçmişdə kəlağayı daha çox baş örtüyü kimi istifadə olunurdusa, bu gün qadınlar onu çox fərqli və modern üsullarla taxırlar:
Boyun şərfi və ya şal kimi: Ən geniş yayılan üsuldur. Sadə, tək rəngli bir köynək, sviter və ya kostyumun üzərindən boyuna dolayaraq obrazı dərhal canlandırırlar.
Çiyin örtüyü kimi: Ziyafət geyimlərinin və ya zərif paltarların üzərindən çiyinə salınaraq həm isti tutur, həm də çox şık görünür.
Gündəlik stildə: İndi gənc qızlar kəlağayını hətta cins şalvar, dəri gödəkcə və ya palto ilə uyğunlaşdırırlar. Milli naxışla müasir geyimin bu cür təzadı çox modern bir görünüş yaradır.
Aksesuar kimi: Bəzən kəlağayını başa lent kimi bağlayır, çantanın dəstəyinə dolayır və ya kəmər əvəzi belə bağlayırlar”.
Əsmətxanım Rzazadə
Telegram kanalımız
