Bəzən bir fincan qəhvəyə ehtiyac olmur. Sadəcə onun qoxusunu hiss etmək belə insanın əhvalına təsir edə bilər.
“Yeni Sabah” xəbər verir ki, Yaponiyada aparılan yeni araşdırma təzə dəmlənmiş qəhvənin qoxusunu cəmi beş dəqiqə iyləməyin beyində rahatlama göstəricisini artıra və mənfi emosiyaları azalda biləcəyini üzə çıxarıb. Araşdırmanın nəticələri “Nutrients” jurnalında dərc olunub. Tədqiqatda 20-29 yaş arasında olan 20 universitet tələbəsi iştirak edib.
Beyində rahatlama göstəricisi artıb Toyuqlu pizza
Tədqiqat zamanı iştirakçıların yaxınlığına təzə dəmlənmiş qəhvə qoyulub və onlar beş dəqiqə ərzində onun qoxusuna məruz qalıblar. Nəticədə iştirakçıların yorğunluq, gərginlik, narahatlıq, çaşqınlıq və depressiv əhval göstəricilərində nəzərəçarpacaq azalma qeydə alınıb. Eyni zamanda beyində rahatlama ilə əlaqələndirilən göstəricinin yüksəldiyi müəyyən edilib. Bununla belə, ürək döyüntüsünün tezliyi və ürək döyüntüləri arasındakı dəyişkənlikdə ciddi fərq müşahidə olunmayıb.
Tədqiqatçılar təcrübə üçün 20 qram üyüdülmüş qəhvəni 400 millilitr isti su ilə dəmləyib və qəhvəni iştirakçılardan təxminən 50 santimetr uzaqda yerləşdiriblər.
Qəhvə qoxusu daha çox mənfi hissləri azaldıb
Beş dəqiqəlik qoxu təsirindən əvvəl və sonra aparılan ölçmələr qəhvə qoxusunun insanlarda enerji və canlılıq hissini dərhal artırmadığını göstərib. Əsas dəyişiklik mənfi emosiyalarda müşahidə olunub. Yorğunluq, gərginlik, narahatlıq, çaşqınlıq və depressiv əhval göstəriciləri aşağı düşüb. Beyindəki alfa, beta və teta dalğalarının nisbəti əsasında hesablanan rahatlama göstəricisində də artım qeydə alınıb.
Qoxu yaddaşla bağlı ola bilər
Tədqiqatçılar qəhvə qoxusunun təsirinin insanın yaddaşı və əvvəlki təcrübələri ilə bağlı ola biləcəyini düşünürlər. Belə ki, qəhvə qoxusu səhər yeməyi, istirahət fasiləsi və dostlarla keçirilən xoş vaxt kimi müsbət xatirələri yada sala bilər. Qoxu duyğusunun beyində emosiyalar və yaddaşla əlaqəli sahələrlə sıx bağlı olduğu məlumdur.
Əsmətxanım Rzazadə
Telegram kanalımız
