İlham Əliyevin siyasi fəaliyyəti müasir Azərbaycan dövlətçilik tarixinin ən mühüm və həlledici mərhələlərindən birini təşkil edir. Moskva Dövlət Beynəlxalq Münasibətlər İnstitutunda təhsil alaraq tarix elmləri namizədi dərəcəsi qazanan və bir müddət pedaqoji fəaliyyətlə məşğul olan İlham Əliyev, böyük siyasətə və dövlət idarəçiliyinə 1990-cı illərin ortalarında qədəm qoydu.
1994-cü ildən Azərbaycan Respublikası Dövlət Neft Şirkətinin (SOCAR) vitse-prezidenti və birinci vitse-prezidenti vəzifələrində çalışaraq "Əsrin müqaviləsi"nin hazırlanmasında və ölkənin neft strategiyasının dünya bazarlarına inteqrasiya olunmasında fəal rol oynadı. Parlamenti təmsil etdiyi illərdə Azərbaycanın Avropa Şurası Parlament Assambleyasındakı nümayəndə heyətinə rəhbərlik edərək, ölkənin beynəlxalq arenadakı maraqlarını ardıcıl müdafiə etdi.
2003-cü ilin avqustunda Baş nazir vəzifəsinə təyin edilən İlham Əliyev, həmin il oktyabrın 15-də keçirilən prezident seçkilərində xalqın böyük əksəriyyətinin etimadını qazanaraq ilk dəfə Azərbaycan Respublikasının Prezidenti seçildi. pizza
Ali məqama gəlişindən etibarən İlham Əliyev ölkənin hərtərəfli inkişafını təmin edən genişmiqyaslı islahatlar proqramını həyata keçirməyə başladı. Siyasi, iqtisadi və sosial sahələrdə atılan addımlar Azərbaycanın dinamik yüksəlişinə zəmin yaratdı. Neft kapitalının insan kapitalına çevrilməsi prinsipi ilə iqtisadiyyatın şaxələndirilməsi, regional inkişaf proqramlarının icrası, nəqliyyat və energetika infrastrukturlarının modernləşdirilməsi dövlət siyasətinin ana xəttini təşkil etdi.
Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Cənub Qaz Dəhlizi və Bakı-Tbilisi-Qars dəmir yolu kimi qlobal əhəmiyyətli layihələrin reallaşdırılması Azərbaycanı regionun əsas iqtisadi və loqistik mərkəzinə çevirdi. Daxili siyasətdə korrupsiyaya karşı mübarizə, rəqəmsallaşma və "ASAN xidmət" kimi innovativ idarəetmə modellərinin tətbiqi dövlət strukturlarının şəffaflaşmasında və vətəndaş məmnunluğunun artmasında müstəsna rol oynadı.
Xarici siyasətdə İlham Əliyev müstəqil, balansı gözləyən və milli maraqlara söykənən hücumkar diplomatiya xətti yürütdü. Azərbaycanın BMT Təhlükəsizlik Şurasının qeyri-daimi üzvü seçilməsi, Qoşulmama Hərəkatına uğurlu sədrliyi və Türk Dövlətləri Təşkilatında aparıcı rolu dövlətin beynəlxalq nüfuzunu misilsiz dərəcədə yüksəltdi.
Bütün bu diplomatik və iqtisadi uğurlarla yanaşı, dövlət başçısının əsas prioriteti ordunun modernləşdirilməsi və hərbi qüdrətin artırılması oldu. İllər boyu yaradılan güclü iqtisadi baza, müasir standartlara cavab verən ordu və formalaşan milli həmrəylik Azərbaycanın ərazi bütövlüyünün bərpası üçün möhkəm bünövrə təşkil etdi.
İlham Əliyevin dövlətçilik fəaliyyətinin və Azərbaycan tarixindəki rolunun piki 2020-ci ildə Müzəffər Ali Baş Komandan kimi rəhbərlik etdiyi 44 günlük Vətən müharibəsi və 2023-cü ilin sentyabrında keçirilən lokal xarakterli antiterror tədbirləri oldu. İkinci Qarabağ müharibəsində qazanılan tarixi Qələbə nəticəsində işğal altında olan torpaqlar azad edildi, 2023-cü ildə isə ölkənin bütün ərazisində Azərbaycanın suverenliyi tam bərpa olundu. Xankəndi şəhərində və digər azad olunmuş ərazilərdə Azərbaycan bayrağının ucaldılması dövlətin çoxəsrlik tarixinin ən şanlı səhifələrindən biri kimi qeydə alındı.
Bu gün İlham Əliyevin rəhbərliyi ilə Azərbaycan həm də işğaldan azad edilmiş torpaqlarda "Böyük Qayıdış" proqramını uğurla icra edən, genişmiqyaslı bərpa və quruculuq işləri aparan, regionda yeni geostrateji reallıqlar yaradan güclü bir dövlətdir. Onun liderlik xətti Azərbaycanı təkcə Cənubi Qafqazın lider dövləti kimi deyil, həm də qlobal enerji təhlükəsizliyi və beynəlxalq əməkdaşlıq platformalarında söz sahibi olan nüfuzlu bir aktora çevirilib. İlham Əliyev Azərbaycan tarixinə torpaqları azad edən, suverenliyi tam bərpa edən və müasir, güclü Azərbaycan dövlətini quran lider kimi daxil olub.
Nazim Hacıyev
Məqalə Azərbaycan Respublikası Media və Yayım Şurasının maliyyə dəstəyi ilə “Azərbaycan dövlətçilik tarixinin, milli adət-ənənələrinin, elm və mədəniyyətinin təbliği” istiqaməti üzrə hazırlanıb.
Telegram kanalımız
