Qarında şişkinliyin haradan başlaması və hansı əlamətlərlə müşayiət olunması onun səbəbi barədə müəyyən ipucları verə bilər. Xüsusilə yeməkdən sonra yaranan doluluq, gün ərzində qarında gərginlik, qəbizlik və tam boşalmama hissi diqqət tələb edən əlamətlərdir.
"Yeni Sabah" xəbər verir ki, qarının üst, bütün və ya alt hissəsində yaranan şişkinlik müxtəlif həzm problemləri ilə əlaqəli ola bilər.
Üst qarında şişkinlik Marqarita pizza
Yeməkdən sonra yaranan doluluq və tez doyma funksional həzm pozğunluğunun əlamətləri arasında yer alır. H. pylori ilə əlaqəli mədə problemləri və mədənin gec boşalması da mümkün səbəblər sırasında qiymətləndirilir.
Bütün qarında şişkinlik
Bağırsaq bakteriyaları həzm olunmayan karbohidratları parçalayarkən qaz əmələ gətirir. Laktoza və fruktoza dözümsüzlüyü, qıcıqlanmış bağırsaq sindromu, çölyak xəstəliyi və nazik bağırsaqda bakteriyaların həddindən artıq çoxalması (SIBO) qarında şişkinliyə səbəb ola bilər. Bəzi insanlarda isə qazın miqdarı çox olmasa belə, bağırsaq həssaslığı səbəbindən qarında güclü gərginlik hissi yarana bilər.
Alt qarında şişkinlik
Alt qarında şişkinlik qəbizliklə əlaqəli ola bilər. Nəcisin bağırsaqlarda yavaş hərəkət etməsi və çanaq dibi əzələlərinin koordinasiyasındakı problemlər də bu vəziyyətə səbəb ola bilər. Sərt nəcis, defekasiya zamanı gücənmə və bağırsağın tam boşalmadığı hissi mühüm əlamətlər hesab olunur.
Qeyd edək ki, şişkinliyin yerləşdiyi nahiyə onun dəqiq səbəbini müəyyənləşdirmək üçün kifayət deyil. Davamlı və ya təkrarlanan şişkinlik, xüsusilə ağrı, arıqlama, qusma, qanlı nəcis və ya davamlı qəbizlik kimi əlamətlərlə müşayiət olunursa, həkimə müraciət etmək lazımdır.
Aytac Əliyeva
Telegram kanalımız
