Bakının iki rayonunda yolların təmiri ilə əlaqədar hərəkət qismən və ya tam məhdudlaşdırıla bilər.
Bu barədə "Yeni Sabah"a Azərbaycan Avtomobil Yolları Dövlət Agentliyindən (AAYDA) məlumat verilib.
Bildirilib ki, sentyabrın 22-də saat 09:00-dan etibarən Qaradağ rayonunda Səməndər İsmayılzadə küçəsinin (Xocəsən–Lökbatan avtomobil yolu) Meyvəli dairəsindən Lökbatan qəsəbəsi, 28 May küçəsi ilə kəsişməyə qədər olan hissəsində təmir işlərinə başlanılacaq. pizza
Həmçinin Binəqədi rayonunda Əcəmi Naxçıvani küçəsinin Azadlıq prospekti ilə kəsişməsindən Atatürk prospekti ilə kəsişməsinə qədər olan hissəsində təmir işləri aparılacaq.
AAYDA-nın məlumatına görə, hərəkətin məhdudlaşdırılması təmir işlərinin mərhələlərindən asılı olaraq qismən və ya tam şəkildə tətbiq edilə bilər.
Sürücülərdən yollarda diqqətli olmaları, yol nişanlarının tələblərinə riayət etmələri və təmir işlərinə anlayışla yanaşmaları xahiş olunur.
Aytac Əliyeva
Telegram kanalımız
