Son illərdə xaricdə təhsil almaq, işləmək və yaşamaq istəyi Azərbaycan gəncləri arasında daha çox müzakirə olunan mövzulardan birinə çevrilib. Bəs gəncləri xarici ölkələrə cəlb edən əsas səbəblər hansılardır?
“Yeni Sabah” xəbər verir ki, gənclərin xaricə marağının arxasında müxtəlif səbəblər dayanır. Daha yüksək gəlir əldə etmək, xaricdə təhsil almaq, karyera qurmaq, yeni peşə imkanları əldə etmək və fərqli həyat təcrübəsi qazanmaq bu səbəblər sırasında yer alır. Xüsusilə ali təhsilini başa vuran və əmək bazarına yeni daxil olan gənclər xaricdə öz ixtisasları üzrə iş imkanlarını araşdırırlar. Bəzi gənclər isə təhsil məqsədilə getdikləri ölkədə sonradan işləmək və yaşamaq qərarı verirlər.
Dövlət Statistika Komitəsinin məlumatına görə, 2026-cı ilin yanvar-avqust aylarında 1 milyon 384,5 min Azərbaycan vətəndaşı xarici ölkələrə səfər edib. Bu göstərici ötən ilin eyni dövrü ilə müqayisədə 2,4 faiz azdır. Xaricə gedən Azərbaycan vətəndaşlarının 43,9 faizi Türkiyəyə, 14,8 faizi Rusiyaya, 12,8 faizi Gürcüstana, 5,3 faizi İrana, 23,2 faizi isə digər ölkələrə səfər edib. Lakin xaricə səfər edən şəxslərin hamısının ölkədən köçdüyünü demək mümkün deyil. Bu statistikaya turizm, təhsil, iş, ailə ziyarəti və digər məqsədlərlə xaricə gedən vətəndaşlar da daxildir. Dominos pizza
Gənclərin xaricə marağında sosial şəbəkələrin də xüsusi yeri var. Xaricdə yaşayan insanların gündəlik həyatlarını, işlədikləri sahələri, qazanc imkanlarını və yaşayış şəraitlərini paylaşması başqa ölkələrdə həyat qurmaq istəyini artıran amillərdən biri kimi diqqət çəkir.
Digər tərəfdən, sosial şəbəkələrdə nümayiş etdirilən həyat xaricdə yaşamağın bütün tərəflərini əks etdirməyə bilər. Kirayə, vergi, nəqliyyat, tibbi sığorta və digər gündəlik xərclər xaricdə yaşayan insanların qarşılaşdığı əsas məsrəflər sırasındadır. Bəzi gənclər üçün isə əsas məqsəd ölkədən birdəfəlik köçmək deyil. Xaricdə təhsil almaq, dil öyrənmək, beynəlxalq iş təcrübəsi qazanmaq və daha sonra Azərbaycana qayıtmaq variantı da mövcuddur.
Beləliklə, gənclərin xaricə getmək istəyinin arxasında yalnız maddi səbəblər dayanmır. Təhsil, karyera, şəxsi inkişaf, yeni təcrübə qazanmaq və fərqli həyat şəraitini sınamaq istəyi də bu qərarda rol oynayır.
Aydan Hacı
Telegram kanalımız
