Çörəyin üzərində kiçik bir kif ləkəsi görəndə çoxları həmin hissəni kəsib atır, qalanını isə yeməyə davam edir. Halbuki bu, sağlamlıq üçün risk yarada bilər. Çünki kif çörəyin yalnız gözlə görünən hissəsində olmur.
“Yeni Sabah” xəbər verir ki, kif göbələkləri çörəyin daxilinə yayıla, bəzi növləri isə sağlamlıq üçün təhlükəli maddələr yaradır.
Kif niyə təhlükəlidir? Dominos pizza
Çörəyin üzərində yaranan kif göbələyinin sporları havada yayılır və uyğun şəraitdə qida məhsulunun üzərində inkişaf edir. Çörəyin yumşaq və məsaməli quruluşu kifin görünməyən hissələrə də yayılmasına şərait yaradır. Bu səbəbdən çörəyin üzərindəki kifli hissəni kəsib atmaq onun qalan hissəsinin təhlükəsiz olduğu demək deyil. Kifin gözlə görünməyən telləri çörəyin daxilinə keçə bilər. Bəzi kif növləri isə mikotoksin adlanan zərərli maddələr yaradır.
Kiflənmiş çörəkdən istifadə bəzi insanlarda allergik reaksiyalara, tənəffüs yollarının qıcıqlanmasına və həzm problemlərinə səbəb ola bilər. Risk kifin növündən, miqdarından və insanın sağlamlıq vəziyyətindən asılıdır.
Çörək nə qədər müddət saxlanıla bilər?
Çörəyin saxlanma müddəti onun növündən, qablaşdırılmasından, temperaturdan və rütubətdən asılıdır. İsti və rütubətli mühit kifin daha sürətlə inkişaf etməsinə şərait yaradır. Çörəyi sərin, quru yerdə, təmiz və uyğun qablaşdırmada saxlamaq kiflənmə riskini azalda bilər. Daha uzun müddət saxlamaq üçün onu dondurmaq da mümkündür. Bununla belə, düzgün saxlama qaydalarına əməl edilməsi belə kiflənmə ehtimalını tam aradan qaldırmır.
Kifli çörəklə bağlı nə etmək lazımdır?
Çörəyin üzərində kif aşkarlandıqda yalnız ləkələnmiş hissəni kəsmək məsləhət görülmür. Ən təhlükəsiz seçim bütün çörəyi atmaqdır. Kiflənmiş çörəyi iyləmək də düzgün deyil, çünki bu zaman kif sporları tənəffüs yollarına düşə bilər. Çörəyin kiflənməsinin qarşısını almaq üçün onu az miqdarda almaq, saxlanma şəraitinə diqqət yetirmək və kif əlamətləri görünən kimi qida məhsulundan istifadəni dayandırmaq lazımdır.
Unutmayın: Çörəyin qalan hissəsinin normal görünməsi onun mütləq təhlükəsiz olduğu demək deyil. Kiflə bağlı risklərdə görünüşə deyil, qida təhlükəsizliyi qaydalarına əsaslanmaq lazımdır.
Əsmətxanım Rzazadə
Telegram kanalımız
