Payız gələn kimi daraqda və duşda əvvəlkindən daha çox saç görənlərin sayı artır. Bəs bunun səbəbi nədir? Mütəxəssislər bildirirlər ki, bəzi hallarda bu, mövsümi və müvəqqəti proses olsa da, uzun müddət davam edən saç tökülməsinə laqeyd yanaşmaq olmaz.
“Yeni Sabah” xəbər verir ki, rusiyalı dermatoloq-trixoloq İnna Petrosovanın sözlərinə görə, insanlar saç tökülməsinin artdığını daha çox yayın sonu və payız aylarında hiss edirlər. Onun sözlərinə görə, mövsüm dəyişikliyi müəyyən rol oynaya bilər. Araşdırmalarda insanların bir hissəsində saçların istirahət və sonradan tökülmə mərhələsinə keçməsinin yayın sonu və payızın əvvəlində artdığı müşahidə edilib. Bu səbəbdən avqust-oktyabr aylarında saç yuyarkən və darayarkən daha çox saç görmək mümkündür.
Lakin trixoloq vurğulayır ki, səbəbi yalnız payızda axtarmaq düzgün deyil. Yay aylarında keçirilən infeksiyalar, yüksək hərarət, əməliyyat, güclü stress, kəskin arıqlama və düzgün qidalanmama saç tökülməsini bir neçə ay sonra artıra bilər. Belə reaktiv saç tökülməsi adətən səbəb olan hadisədən dərhal sonra deyil, təxminən 2-3 ay sonra başlayır. Sezar pizza
Saç niyə gecikərək tökülür?
Saçların öz böyümə dövrü var. Saçların böyük hissəsi böyümə mərhələsində olur, müəyyən hissəsi isə istirahət mərhələsinə keçir. İstirahət mərhələsinin sonunda həmin saç tökülür və yerində yeni saçın böyüməsi başlayır. Buna görə də insan yayda yaşadığı stressi və ya keçirdiyi xəstəliyi payızda saç tökülməsi şəklində görə bilər.
Amerika Dermatologiya Akademiyası da bildirir ki, gündə təxminən 50-100 saç telinin tökülməsi normal hesab olunur. Stress, yüksək hərarət, xəstəlik, əməliyyat və kəskin çəki itkisi isə müvəqqəti olaraq daha güclü saç tökülməsinə səbəb olur.
Sərt pəhriz də saçları tökə bilər
Payızda saç tökülməsinin başqa səbəblərindən biri qidalanmadır. Xüsusilə yay aylarında sürətli arıqlamaq üçün sərt pəhriz saxlayan insanlarda saç tökülməsi sonradan arta bilər. Trixoloqlar bildirir ki, kəskin çəki itkisi, aclıq və qida qruplarının tamamilə rasiondan çıxarılması saç tökülməsini gücləndirir. Zülal, dəmir və sink kimi maddələrin kifayət qədər qəbul edilməməsi saçların böyümə dövrünə təsir göstərir.
Nə vaxt narahat olmaq lazımdır?
Mövsümi saç tökülməsi adətən bütün baş nahiyəsində bərabər şəkildə olur və gec payız-qış aylarına doğru azalır. Əgər saç tökülməsi 2-3 aydan çox davam edirsə, saçların ümumi sıxlığı azalırsa, saç ayrımı genişlənirsə və ya baş dərisində seyrəlmiş, tamamilə tüksüz sahələr yaranırsa, artıq səbəbi araşdırmaq lazımdır. Baş dərisində qaşınma, qızartı və qabıqlanma da varsa, dermatoloq və ya trixoloqa müraciət etmək məsləhətdir.
Mütəxəssislər qeyd edirlər ki, belə hallarda yalnız saç tökülməsinə qarşı şampun və maskalara ümid etmək düzgün deyil. Çünki saç tökülməsinin səbəbi dəmir çatışmazlığı, qalxanabənzər vəzinin problemləri, hormonal dəyişikliklər, stress, qidalanma və ya başqa xəstəliklərlə əlaqəli ola bilər. Səbəb müəyyən edilmədən aparılan müalicə nəticə verməyə bilər.
Əsmətxanım Rzazadə
Telegram kanalımız
